Eit program fullt av høgdepunkt
Allereie fredag ettermiddag starta campen med fridykking i Godøystraumen, der deltakarane fekk oppleve den mektige naturen under vatn. Laurdag var det klatring på Hobbit- og Drageveggen som stod for tur, før grillen blei tent ved Godøystraumen og ungdommane hoppa i våtdraktene igjen for nok ein dykketur.
Sundagen runda det heile av med buldring og uformell konkurranse på Mjelle – spektakulær klatring i strandkanten.
– Vart kjent med nye folk
– Det beste var å prøve noko heilt nytt og bli kjent med andre som likar dei same tinga, seier ein av deltakarane, som fekk sin første smak på fridykking denne helga.
Instruktørane var imponerte over kor modige og engasjerte ungdommane var. – Dei tok utfordringane på strak arm og støtta kvarandre gjennom heile helga. Det var verkeleg kjekt å sjå, seier ein av instruktørane frå Bodø Klatreklubb.
Trygge rammer og stort fellesskap
Camp Saltstraumen vart gjennomført med klare tryggleiksreglar og god oppfølging frå erfarne instruktørar. Ungdommane fekk lære både teknikk, samarbeid og korleis ein tek vare på seg sjølv og andre i krevjande omgjevnader.
– Me ønskjer å gi ungdom gode opplevingar ute, og dette er ein måte å kombinere aktivitet, læring og fellesskap på, seier arrangørane.
Vil ha med fleire neste år
Sjølv om det var plass til 20 deltakarar, blei det i år 14 som meldte seg på innan fristen. Arrangørane håpar endå fleire ungdommar vil gripe sjansen neste gong.
– Vi kjem tilbake neste år med nye utfordringar og nye moglegheiter for ungdom som vil ut av komfortsona og inn i naturen.
Camp Saltstraumen er eit samarbeid mellom Norges Dykkeforbund, Padleforbundet og Klatreforbundet. Tiltaket er støtta av Miljødirektoratet.
